Рӯзи умумиҷаҳонии солимии равонӣ

Душанбе, 10 октябр. (АМИТ «Ховар», Ибодат Давлатова).- Бо ташаббуси Федератсияи умумиҷаҳонии солимии равонӣ аз соли 1992 инҷониб 10 октябр ҳамчун Рӯзи умумиҷаҳонии солимии равонӣ қайд мешавад. Дар ҷумҳурии мо низ ҳамасола дар ин рӯз чорабиниҳои гуногун баргузор мегарданд. Тавре ки ба мухбири АМИТ «Ховар» аз Вазорати тандурустии Ҷумҳурии Тоҷикистон хабар доданд, дар кишвар дар бобати солимии равонӣ 29 ҳуҷҷати меъёрию ҳуқуқӣ аз ҷониби Вазорати тандурустӣ қабул шудааст, ки дар онҳо дар бораи беморони равонӣ, ҳуқуқҳои волидайни онҳо, ҳуқуқи табиби равоншинос, ҳуқуқи ҳамшираҳои тиббие, ки дар муассисаҳои табобатӣ фаъолият доранд, маълумот дода шудааст. Бояд гуфт, ки дар кишвари мо Қонуни Ҷумҳурии Тоҷикистон дар бораи равонпизишкӣ амал мекунад, ки он соли 2002 қабул гардида, соли 2004 ба он тағйироту иловаҳо ворид шудааст. Феълан дар ҷумҳурӣ Маркази ҷумҳуриявии клиникии бемориҳои руҳӣ, Маркази ҷумҳуриявии саломатии руҳии кӯдакону наврасон, беморхонаи ҷумҳуриявии клиникии бемориҳои руҳӣ, беморхонаи вилоятии бемориҳои руҳӣ дар вилояти Суғд, Маркази байниноҳиявии психоневрологии шаҳри Турсунзода, 17 дармонгоҳ, 65 ҳуҷраи психиатрӣ барои табобат ва пешгирии беморони равонӣ фаъолият доранд.