«Суғд семент» ба фаъолият шуруъ намуд

Душанбе, 29 октябр. (АМИТ «Ховар», Дилшодаи Хайруллоҳ). — Имрӯз корхонаи сементи ҶДММ «Суғд семент» ба фаъолият оғоз намуд. Дар маросими кушоиш ва ба фаъолияти мунтазам оғоз намудани корхона Вазири энергетика ва саноати Ҷумҳурии Тоҷикистон Гул Шералӣ иштирок намуд.Тавре ки қаблан иттилоъ дода шуда буд, корхонаи семент ба истеҳсоли таҷрибавию озмоишии семент рӯзи 27 августи соли 2012 оғоз намуда буд. Иқтидори солонаи истеҳсолии марҳилаи аввали корхона 100 ҳазор тонна сементро ташкил дода, дар айни замон 142 ҷойи нави корӣ муҳайё гардидааст. Завод бо маблағгузории сармоягузори ватанӣ бунёд ёфта, таҷҳизоти он бо маблағи 1842000 долл. ИМА аз Ҷумҳурии Мардумии Чин ворид шудааст.Марҳилаи дуюми бунёди корхона баъди ба роҳ мондани фаъолияти мунтазами марҳилаи аввал оғоз шуда, иқтидори он истеҳсоли 1 миллион тонна сементро дар як сол дар бар мегирад. Роҳбарияти корхона ба нақша гирифтааст, ки бо афзоиши истеҳсолии корхона шумораи ҷойҳои кориро ба 300 нафар расонад.