Суръати баланди пармакорӣ дар нақби «Чормағзак»

Душанбе, 22 октябр. (АМИТ «Ховар», Кристина Эрлих). – Дар нақби «Чормағзак» аз оғози татбиқи лоиҳаи сохтмон то имрӯз ба масофаи 3 ҳазору 735 метр пармакорӣ сурат гирифта, 3 ҳазору 380 метр бетонрезӣ шудааст. Барои анҷоми сохтмон бояд ҳамагӣ 695 метр пармакорӣ ва 1 ҳазору 50 метр бетонрезӣ шавад.Қобили зикр аст, ки баъди ба истифода додани нақби «Чормағзак» масофаи роҳи мошингарди Душанбе — Ваҳдат — Кӯлоб нисбат ба масофаи роҳи мошингарди Душанбе — Қӯрғонтеппа — Кӯлоб баробари 100 километр кӯтоҳ мегардад. Мувофиқи лоиҳа масофаи умумии ин нақб 4 ҳазору 430 метрро ташкил медиҳад. Лоиҳаи мазкур аз ҳисоби қарзи ҳукумати Чин бунёд мешавад. Арзиши умумии лоиҳа 64 миллион доллари ИМА – ро ташкил медиҳад.