Тақвияти ҳамкориҳои ду вилояти ҳамҷавор

Хоруғ, 11 октябр. (АМИТ «Ховар», Л. Додо).-Дар шаҳри Хоруғ нишасти ҳайати комиссияи муштараки байнивилоятӣ таҳти роҳбарии раиси Вилояти Мухтори Куҳистони Бадахшони ҷумҳурии Тоҷикистон Қодири Қосим ва волии вилояти Бадахшони Ҷумҳурии Исломии Афғонистон Шоҳвалиуллоҳи Адиб баргузор шуд.Раиси ВМКБ Қодири Қосим ҳайати комиссияи ҷониби Афғонистонро ҷиҳати ташрифашон ба шаҳри Хоруғ хайрамақдам гуфта, баҳри тақвияти ҳамкориҳо байни ду вилояти ҳамҷавор изҳори уиедворӣ намуд. Дар ҷараёни мулоқот ҷонибҳо оид ба таъмини волоияти қонун, таҳкими ҳамкориҳои густурда дар заминаи тақвияти марз ва дигар масъалаҳои соҳаи иҷтимоӣ ва иқтисодӣ дахл карданд.Вилояти Мухтори Куҳистони Бадахшон бо Ҷумҳурии Исломии Афғонистон дар масофаи беш аз 800 километр марзи муштарак дошта, ба ин далел тақвияти марзи ҳар ду кишвар ба манзури ҷилавгирӣ аз афзоиши қочоқи маводи мухаддир аз мавзуъҳои аслии ин мулоқот буд.Ҳамчунин ҷонибҳо аз густариши ҳамкориҳои дуҷонибаи иқтисодию ичтимоӣ ва фарҳангӣ, бунёди пулҳои нақлиётӣ бар болои рӯдхонаи Панҷ ва таъсиси бунгоҳҳои тиҷоратии наздимарзӣ изҳори қаноатмандӣ карданд. Зикр шуд, ки дар ояндаи наздик ҳамчунин дар мавзеи Хумроғии ноҳияи Ванҷи ВМКБ дар радифи пули мошингард аз болои дарёи Панҷ бозори дигари наздимарзӣ бунёд мегардад. Гуфта шуд, ки бо ба истифода додани ин нуқтаи тиҷоратӣ беш аз 70 ҳазор нафар сокини ҳар ду вилоят ба тиҷорат ҷалб хоҳанд шуд.Дар мулоқот раиси Кумитаи давлатии амнияти миллии Ҷумҳурии Тоҷикистон С. Ятимов ва сардори раёсати Кумитаи давлатии амнияти миллӣ дар ВМКБ Амирбек Бекназаров ширкат варзида, аз ҳамкориҳои байни мақомоти ҳар ду вилоят дар заминаи тақвияти марз ҷиҳати ҷилавгирӣ аз қочоқи маводи мухаддир, аслиҳа ва дигар амалҳои ғайриқонунӣ сухан гуфтанд.