Такмили ихтисоси кормандони АНММ

Душанбе, 12 октябр. (АМИТ «Ховар», Лутфия Эшонқулова). – Моҳи октябри соли ҷорӣ як қатор кормандони Агентии назорати маводи мухаддири назди Президенти Ҷумҳурии Тоҷикистон дар семинарҳои таълимӣ малакаҳои худро такмил доданд. Тавре ки аз маркази матбуоти Агентии назорати маводи мухаддир ба АМИТ «Ховар» хабар доданд, дар шаҳри Анқараи Туркия тренинги таълимӣ баргузор гардид, ки дар он сардори Раёсати Агентии назорати маводи мухаддир дар вилояти Хатлон Зафар Сайфуллоев иштирок дошт. Сардори Ситоди Агентии назорати маводи мухаддир Фарҳод Саъдуллоев дар ҳамоиши аъзои роҳбарикунандаи Комиссияи Иттиҳоди гумруки кишварҳои Осиёи Ҷануби Шарқӣ, ки аз 8 то 14 октябри соли ҷорӣ дар Олмон ва Чехия давом мекунад, иштирок дорад. Ғайр аз ин шӯъбаи назорати маводи мухаддир ва ҳифзи тартиботи Сафорати ИМА дар ҶТ барои кормандони марказҳои матбуоти мақомоти ҳифзи ҳуқуқ ва сохторҳои қудратии Ҷумҳурии Тоҷикистон сафари дуҳафтаина ба Иёлоти Муттаҳидаи Амрикоро ташкил намуд. Иштирокдорони ин сафар бо кори ҳамтоёни худ аз Вазорати адлияи ИМА, Бюрои федералии тафтишот, ҳамчунин Маъмурияти мубориза бо маводи мухаддир шинос шуданд.