Тамоюли нишондиҳандаҳои асосии макроиқтисодӣ ва пулӣ

Душанбе, 31 октябр. (АМИТ «Ховар»,Фарзона Достонзода).- Дар давоми нуҳ моҳи соли 2012 раванди рушди иқтисодиёти Ҷумҳурии Тоҷикистон бо афзоиши муътадили истеҳсолот ва пешниҳоди молу маҳсулоти ватанӣ ба қайд гирифта шуд. Тавре ки ба АМИТ «Ховар» аз департаменти сиёсати пулии Бонки Миллии Ҷумҳурии Тоҷикистон хабар доданд: «Ҳаҷми ММД дар давраи баррасишаванда ба 24,8 млрд. сомонӣ расида, суръати рушди воқеии он 7,5 фоизро ташкил намуд. Рушди муътадил дар бахшҳои асосии иқтисодиёти кишвар, аз ҷумла гардиши савдои чакана 18,2 фоиз, хизматрасонӣ 13,0 фоиз, истеҳсоли маҳсулоти саноатӣ 10,4 фоиз ва истеҳсоли маҳсулоти кишоварзӣ 9,8 фоиз ба қайд гирифта шуд. Мутобиқи «Барномаи Ҳукумати Ҷумҳурии Тоҷикистон оид ба сиёсати молиявию иқтисодӣ» нишондиҳандаҳои асосии пулӣ, аз қабили захираҳои софи байналмилалӣ, дороиҳои умумии хориҷӣ ва дороиҳои софи дохилӣ мунтазам афзоиш ёфта, дар моҳи сентябри соли ҷорӣ нисбат ба ҳамин давраи соли 2011 мувофиқан 32,4 фоиз, 32,0 фоиз ва 29,8 фоиз афзуданд. Татбиқи сиёсати пулию қарзӣ, ки бо истифода аз воситаҳои монетарӣ сурат мегирад, ба муътадил нигоҳ доштани сатҳи таваррум, рушди бозори коғазҳои қиматнок, таҳкими бозори дохилии асъор, нигоҳ доштани устувории низоми бонкӣ, таъмини пардохтпазирии ташкилотҳои қарзӣ ва мусоидат ба бахши воқеии иқтисодиёт равона шудааст.