Таъсиси Шўрои ҳамоҳангсоз аз ҳисоби роҳбарони аввал

Душанбе, 4 октябр.(АМИТ «Ховар», Марзия Саидова).- Палатаи поёнии парлумони Тоҷикистон- Маҷлиси намояндагон лоиҳаи Қонуни нав – Қонуни Ҷумҳурии Тоҷикистон «Дар бораи шарикии давлат ва бахши хусусӣ»-ро баррасӣ ва қабул кард. Назар ба иттилои Давлаталӣ Саидов- раиси Кумитаи давлатии сармоягузорӣ ва идораи амволи давлатии кишвар бо мақсади татбиқи лоиҳаи қонуни мазкур Шўрои ҳамоҳангсоз аз ҳисоби роҳбарони аввали вазорату идораҳои марбутаи кишвар ва бахши хусусӣ созмон дода шуда, роҳбарии он ба уҳдаи муовини аввали Сарвазири мамлакат вогузор мегардад. Давлаталӣ Саидов бо шарҳи лоиҳаи қонуни мазкур гуфт, ки ҳамкории судманди давлат бо бахши хусусӣ метавонад аз омилҳои асосии ҷалби васеи сармоягузориҳои хусусӣ барои татбиқи лоиҳаҳои инфрасохторӣ ва идораи онҳо гардад.Тибқи лоиҳаи қонуни пешниҳодгардида вазифаҳои танзимкунӣ ва назоратиро аз ҷониби давлат вазорату идораҳои соҳавӣ ё мақоми махсуси ваколатдор амалӣ менамоянд. Зикр шуд, ки ҳадафи асосии лоиҳаи қонун дастгирӣ ва рушди минбаъдаи соҳибкорӣ, ҷалби сармояи дохиливу хориҷӣ ва иштироки фаъоли бахши хусусӣ дар рушди иқтисодиёти кишвар аст. Лоиҳаи Қонуни Ҷумҳурии Тоҷикистон «Дар бораи шарикии давлат ва бахши хусусӣ» асосҳои ҳуқуқӣ, иқтисодӣ ва ташкилии ҳамкории давлат ва бахши хусусиро муайян менамояд. Ҳамзамон он тартиби татбиқи лоиҳаҳои шарикии давлат ва бахши хусусӣ дар соҳаи инфрасохторӣ ва хизматрасонии иҷтимоиро муқаррар карда, ҳифзи ҳуқуқу манфиатҳои қонунии давлат ва бахши хусусиро таъмин месозад. Зимни баррасии лоиҳаи ин қонун раиси парлумони кишвар Шукурҷон Зуҳуров доир ба шаффоф ва одилона гузаронидани тендерҳо дар ҷумҳурӣ изҳори нигаронӣ намуда, таъкид кард, ки дар самти гузаронидани озмуну тендерҳо ба он камбудию норасоиҳое, ки ҷой доранд, бояд хотима бахшид.