Вакилон бо фаъолияти «Golzow Betriebs-GmbH» шинос шуданд

Душанбе, 11 октябр.(АМИТ «Ховар», Марзия Саидова).- Ҳайати парлумонии Тоҷикистон аз Олмон бозгашт.Сафари ҳайати парлумонии тоҷик, ки дар он вакилон Азизмат Имомов, Нурулло Оқилов, Сабоҳат Муқумова ва Меҳроҷиддин Ҳакимов шомил буданд, бо даъвати Бундестаги Олмон, хусусан гурeҳи дўстӣ ва ҳамкории Маҷлиси намояндагони Тоҷикистон бо парлумони Олмон ҷараён гирифт. Вакилони палатаи поёнии парлумони Тоҷикистон зимни сафар аз ин кишвари аврупоӣ аз маҷмааи ёдбуди ҷанговарони Армияи Сурх дар минтақаи Зееловери Олмон боздид намуда, барои гиромидошти хотираи ҷанговарони қурбоншудаи Иттиҳоди Шўравӣ дар Ҷанги Бузурги Ватанӣ дар пояи муҷассама гулчанбар гузоштанд. Ҳайати парлумонии Тоҷикистон ҳамзамон аз калонтарин ширкати кишоварзии Олмон «Golzow Betriebs-GmbH», Маркази Пажуҳишгоҳи соҳаи кишоварзии Лейбнитс дидан намуданд. Бо пешниҳоди раиси Гуруҳи байнипарлумонии Бундестаги Олмон ва Осиёи Марказӣ Дагмар Энкелман вохўрии ҳайати парлумонии Тоҷикистон бо роҳбарияти шаҳри Голтсов ва доираҳои сиёсии он, бо роҳбари референти Бундестаги Олмон Томас Ҳадамек ва дигар намояндагони Бундестаги Олмон дидору мулоқот намуда, масъалаҳои марбут ба таҳкими ҳамкориҳои мутақобилан судманди Тоҷикистону Олмонро матраҳ намуданд.