Вазирон дар ҶМЧ ҷамъ меоянд

Душанбе, 25 октябр. (АМИТ «Ховар», Пайрав Назаров). – Вазирони 10 кишвари Қафқоз, Осиёи Марказӣ, Шарқӣ ва Ҷанубӣ барои муҳокимаи масоили рушди равобит ва ҳамкории кишварҳои минтақа дар шаҳри Вухани Ҷумҳурии Мардумии Чин ҷамъ меоянд. Ин чорабинӣ аз 29 то 31 октябр сурат мегирад. Дар ин бора аз намояндагии Бонки рушди Осиё дар Тоҷикистон хабар доданд. Дар шаҳри Вухан конфронси 11 — уми вазирони Афғонистон, Озарбойҷон, Қазоқистон, Ҷумҳурии Мардумии Чин, Қирғизистон, Муғулистон, Покистон, Тоҷикистон, Туркманистон ва Ӯзбекистон дар ҳошияи Барномаи ҳамкории минтақавии иқтисодии Осиёи Марказӣ баргузор мегардад. Барномаи ҳамкорӣ лоиҳаю ибтикоротро дар чор бахши афзалиятнок аз қабили нақлиёт, энергетика, мусоидат ба тиҷорат ба манзури рушди иқтисодиёт ва коҳиш додани камбизоатӣ дар минтақа дар бар мегирад.