Вохӯрии соҳибкорони Тоҷикистону Русия

Душанбе, 5 октябр.(АМИТ «Ховар» Ибодат Давлатова)- Имрӯз дар бинои «Душанбе-Плаза» вохӯрӣ бо иштироки тоҷирони саршинос ва ходимони ҷамъиятии ҳайати бонуфузи Русия ва намояндагони мақомоти давлатии Тоҷикистон ва доираҳои тиҷоратию соҳибкории кишвар, коршиносони Шӯрои ҳамоҳангсозӣ баргузор гардид.   Мақсади вохӯрӣ баррасии дурнамои ҳамкории доираҳои соҳибкории ду кишвар, ҷалби сармояи ҷониби Русия ба иқтисодиёти Тоҷикистон барои татбиқи лоиҳаҳои муштарак ва эҳтимолияти шомилшавии Тоҷикистон ба Иттиҳоди гумрукӣ мебошад. Инчунин дар нишаст вобаста ба дурнамои ҳамгироии иқтисодии Тоҷикистону Русия, мавзӯи Иттиҳоди гумрукии Русия, Қазоқистон ва Беларус, ки ба сиёсати иқтисодӣ ва тиҷоратии кишвари мо таъсири назаррас дошта, аҳамияти аввалиндараҷа касб менамояд, сухан гуфтанд. Тавре ки иштирокчиён иброз намуданд, аз се як ҳиссаи гардиши маҳсулоти хориҷии мо маҳз ба кишварҳои Иттиҳоди гумрукӣ рост меояд. Аз ин рӯ, дурнамои рушди Тоҷикистонро ҳамкориҳои зич ва анъанавӣ бо аъзои ин Иттиҳод, махсусан Русия муайян хоҳад кард. Бояд қайд намуд, ки иқдомгузор ва ташкилкунандаи ин чорабинӣ Шӯрои ҳамоҳангсозии Ассотсиатсияҳои соҳибкорон ва иттиҳодияҳои ҷамъиятии Тоҷикистон мебошад.