Забон — рамзи ҳуввияти миллӣ

Душанбе, 5 октябр. (АМИТ «Ховар», Раъно Нусратуллоева).-Имрӯз дар толори фарҳангии Донишкадаи давлатии забонҳои Тоҷикистон ба номи Сотим Улуғзода бахшида ба Рӯзи забони давлатии Ҷумҳурии Тоҷикистон дар мавзӯи «Забони тоҷикӣ-рамзи худшиносӣ ва ҳуввияти миллӣ» конфронси илмию методии ҷумҳуриявӣ баргузор гардид. Конфронсро ректори донишкада, доктори илмҳои фалсафа, профессор Хуршедҷон Зиёев ифтитоҳ намуда, гуфт, ки маҳз дар даврони истиқлолият забони тоҷикӣ ҳамчун забони давлатӣ ташаккул ёфт. Дар конфронс устодони кафедраи забони тоҷикӣ- номзади илми филология Саодатшо Матробов дар мавзӯи «Нигоҳе ба таърихи забони тоҷикӣ», номзади илми филология Маҳбуба Бобомуродова дар мавзӯи «Забони миллӣ—омили худшиносӣ ва бакои миллат» ва Акбаршо Шосаидов дар мавзӯи «Забондонӣ тақозои замон ва омили пешрафти ҷомеа» маърӯза карданд. Дар конфронс инчунин мутахассисон Шодмон Мансуров, сардори шӯъбаи ташкилию ҳуқуқии Кумитаи забон ва истилоҳоти назди Ҳукумати Ҷумҳурии Тоҷикистон ва Сайфиддин Мирзозода, мудири гурӯҳи яғнобшиносии Пажуҳишгоҳи забон, адабиёт, шарқшиносӣ ва мероси хаттии ба номи Абуабдуллоҳи Рӯдакии АИ ҶТ иштирок ва суханронӣ намуданд.