Задухӯрд дар Дарфури Судон

Душанбе, 24 октябр. (АМИТ «Ховар»).- Дар минтақаи Дарфури Судон гуруҳи силоҳбадастони номаълум неруҳои сулҳпарвари Иттиҳоди Африқоро мавриди ҳамла қарор дод. Бино ба маълумоти шабакаи телевизионии «Ал-Ҷазира»-и давлати Қатар дар такя ба расонаҳои маҳаллӣ, зимни ҳуҷуми ногаҳонӣ 42 нафар ба ҳалокат расид. Бояд гуфт, ки неруҳои сулҳпарвари Иттиҳоди Африқо ба минтақаи Дарфури Судон соли 2007 –ум сафарбар гардида буданд. Дастикам 4 нафар аз неруҳои посдори сулҳи Нигерия низ дар пайи чунин як ҳамла дар манотиқи ғарбии минтақаи Дарфури Судон ҷон бохтанд. Тавре ки хабар дода мешавад, силоҳбадастон шабона маҳали будубоши неруҳои сулҳпарвари Иттиҳоди Африқо ва Созмони Милали Муттаҳидро ба муҳосира кашидаанд. Неруҳои посдори сулҳи Созмони Милали Муттаҳид низ зарбаи ҷавобӣ заданд. Дар хусуси теъдоди талафоти ҳамлагарон то ҳол маълумоти мушаххас дода нашудааст.Тарҷумаи Иброҳими Ҳабибуллоҳ