Ҳалокати марговар дар чуқурии 15 метр

Душанбе, 26 ноябр. (АМИТ «Ховар», Музаффар Рустамов).-Дирӯз дар вилояти Хатлон соати 12:50 мошини тамғаи “УАЗ”452-А таҳти идораи ронанда Баҳром Абдулҳакимови 24- сола, сокини ноҳияи Балҷувон ҳангоми ҳаракат аз уҳдаи идораи воситаи нақлиёт набаромада, ба чуқурии 15 метр чапа мешавад, ки дар натиҷа худи ронанда ҷароҳати ҷисмонӣ бардошта, дар ҷойи ҳодиса ба ҳалокат мерасад. Ба иттилои корманди шуъбаи ташвиқоту тарғиботи раёсати Бозрасии давлатии автомобилии Вазорати корҳои дохилии ҶТ Маҳмадшариф Шамсов шабонарӯзи гузашта дар роҳҳои мошингарди ҷумҳурӣ се садамаи нақлиётӣ ба қайд гирифта шуда, дар натиҷаи он як нафар ба ҳалокат расида, се нафари дигар бо ҷароҳати гуногуни ҷисмонӣ дар беморхонаҳо бистарӣ гардидаанд.