Ҳ. Алтер: «Дурнамои ҳамкориҳои мо нек аст»

Душанбе, 5 ноябр.(АМИТ «Ховар», Марзия Саидова).- «Сафари кории ҳайати парлумонии Швейтсария ба Тоҷикистон дар густариши робитаҳои байнипарлумонии ҳар ду кишвар нақши муассир хоҳад гузошт», гуфт зимни мулоқоташ Маҳмадсаид Убайдуллоев-раиси Маҷлиси миллии Маҷлиси Олии ҷумҳурӣ бо Ҳанс Алтер- Президенти Шўрои Кантонҳои Парлумони Конфедератсияи Швейтсария. Мавсуф афзуд, ки ҳамкориҳои парлумонӣ имкон хоҳад дод, ки дар оянда сатҳи робитаҳои гуногунҷабҳаи давлатӣ мутобиқ ба сиёсати дўстонаи сарони кишварҳо вусъати тоза касб карда, парламентарҳои давлатҳо бо фароҳам овардани заминаҳои ҳуқуқӣ дар ин самт саҳми босазо хоҳанд гузошт.Ҳанс Алтер -раиси палатаи болоии парлумони Швейтсария дар навбати худ гуфт, ки дар оянда ҷиҳати густариши робитаҳои байнипарлумонӣ аз имкониятҳои мавҷуда ва салоҳияташ истифода менамояд.Тибқи иттилои Шавкат Саидов- ёвари раиси Маҷлиси миллӣ мулоқот дар фазои ҳусни тафоҳум сурат гирифта, мусоҳибон маҷмўи масъалаҳои дигари вусъати ҳамкориро матраҳ намуданд.