210 ҳазор рубли русӣ ба муҳоҷир баргардонида шуд

Душанбе, 1 ноябр. (АМИТ «Ховар» Ибодат Давлатова).- Бештар аз 210 ҳазор рубли русӣ ба сифати музди меҳнат барои корҳои сохтмонӣ ба муҳоҷири меҳнатӣ баргардонида шуд. Тавре ки ба мухбири АМИТ «Ховар» аз маркази матбуотии Хадамоти муҳоҷират итилоъ доданд, бо саъю кӯшиши кормандони Намояндагии Хадамоти муҳоҷирати назди Ҳукумати Ҷумҳурии Тоҷикистон дар Федератсияи Русия ба сокини шаҳри Кӯлоб Қурбоналӣ Имомови 43- сола музди меҳнаташ, ки бо сабабҳои номаълум аз ҷониби шаҳрванди ФР Игор Постников пардохт намегашт, баргардонида шуд. Қурбоналӣ Имомов моҳе қабл бо дархости ҳалли ин мушкилот ба намояндагии Хадамоти муҳоҷират дар ФР муроҷиат кард. Дар натиҷаи андешидани тадбирҳои саривақтӣ аз ҷониби корфармо ҳаққи ӯ ба пуррагӣ пардохт гардид, қайд намуд манбаъ.