Афзоиши бунёди корхонаҳо дар Суғд

Душанбе, 12 ноябр. (АМИТ «Ховар», Бекназари Абӯбакр). — «Соли гузашта 65 коргоҳ мавриди истифода қарор гирифт. Имсол соҳибкорони вилоят қариб 100 корхонаи хурду миёнаро ба кор дароварданд», — иттилоъ дод раиси вилояти Суғд Қоҳир Расулзода дар ҷаласаи сеюми Шӯрои машваратии назди раиси вилоят оид ба беҳтар намудани фазои сармоягузорӣ.Вай афзуд: «Шӯрои машваратӣ, бо боварии том метавон гуфт, ба рушди соҳа хизмат мекунад». Аз хадамоти матбуоти раиси вилояти Суғд иттилоъ доданд, ки дар Шӯро ҳамчунин дар бораи нақшаи чорабиниҳо оид ба бартараф намудани монеаҳо ҳангоми сохтани корхонаҳои нав ва ворид намудани таҷҳизоти технологӣ ба вилоят сухан рафта, пешниҳодҳои аъзои Шӯро оид ба ин масъала баррасӣ гардид.