Баргузории маҳфили эҷодии нависанда Бароти Абдураҳмон

Душанбе, 26 ноябр . (АМИТ «Ховар», Сарвинози Руҳуллоҳ)-Рӯзи 27 ноябри соли равон дар толори Иттифоқи нависандагони Тоҷикистон маҳфили эҷодии нависандаи шинохта Бароти Абдураҳмон баргузор мегардад. Бароти Абдураҳмон аз зумраи адибони боистеъдоди Тоҷикистон аст, ки дар адабиёти муосири тоҷик ҷойгоҳи хоси худро дорад. Номбурда муаллифи романи «Куруши кабир» буда , «Барфи аввал» ва «Мужда» нахустин ҳикояҳои ин нависанда маҳсуб мешаванд. Намунае аз қисса ва ҳикояҳои ӯ ба забонҳои русӣ, украинӣ ва ӯзбекӣ тарҷума ва нашр гардидааст. Ҳамчунин дар қиссаҳои «Кимиёкаҳ» ва «Давлати сарам модарам» нависанда равобити инсон бо табиат, ноҳамвориҳои зиндагӣ, ишқи поку самимияти баланди инсон нисбат ба оламу одамро моҳирона ба қалам додааст. Дар соли 2001 Театри академии ба номи Лоҳутӣ драмаи Б.Абдураҳмон «Хатои Искандари Мақдунӣ»-ро ба саҳна гузошт, ки асар ба истиқболи гарми тамошобинон мувоҷеҳ гардид. Кинповести «Шамшер ва ишқ», филмномаҳои «Тифли домони туям, модар», «Васвасаҳои хунфишон» ва «Муъҷизаи ҳаштуми олам» дастовардҳои муносиби нависанда дар эҷоди асарҳои таърихист. Маврид ба зикр аст, ки Бароти Абдураҳмон дорандаи Ҷоизаи давлатии ба номи Абуабдулло Рудакӣ ва Ҷоизаи адабии ба номи Садриддин Айнист.