Баррасии мушкилоти мероси урании даврони Шӯравӣ

Душанбе, 20 ноябр. (АМИТ «Ховар», Саидэҳсон Солиев).- Семинари байналмилалии «Мероси урании Иттиҳоди Шӯравӣ дар Осиёи Марказӣ: мушкилот ва ҳалли он» имрӯз дар шаҳри Душанбе бо ибтикори Агентии амнияти ядроӣ ва радиатсионии Академияи илмҳои Ҷумҳурии Тоҷикистон оғоз ёфт. Дар қисмати аввали семинар гуфта шуд, ки дар Ӯзбекистон, Қазоқистон, Қирғизистон ва Тоҷикистон мавзеъҳое вуҷуд доранд, ки дар онҳо партовҳои уранӣ мавҷуданд, ки аз даврони Шӯравӣ боқӣ мондаанд. Бахусус дар Тоҷикистон минтақаҳои Табошар, Чкалов, Адрасмон ва Деҳмой ба ин мушкилот мувоҷеҳанд. Инчунин ширкаткунандагон дар баробари барасии мушкилот роҳҳои ҳалли онро низ баррасӣ карданд. Дар семинар намояндагон аз Русия, Қазоқистон Қирғизистон ва дигар кишварҳо низ ширкат карданд. Тибқи барнома семинари байналмилалӣ ду рӯз — 20-21 ноябр идома мекунад.