Чойхонаи миллӣ дар Маркази Боғи ботаникии Тоҷикистон

Душанбе, 29 ноябр. (АМИТ «Ховар», Заррина Саидова). -Дар доираи ташаббусҳои созандаву бунёдкорона боз як чойхонаи замонавии миллӣ, ки бо иқдоми ватандӯстонаи роҳбарияти «Роҳи оҳани Тоҷикистон» бунёд мегардад, мавриди баҳрабардории сокинони пойтахт қарор мегирад. Бинои навбунёди муҳташами чойхона , ки бо нақшу нигори зебову дилкаши болои чӯб, санг, гаҷ ва оина оро ёфтааст, дар дохили иншооти Муассисаи давлатии илмии «Боғи марказии ботаникии Тоҷикистон» қомат афрохта ва ба ин мавзеъ ҳусни тоза зам намудааст. Барои ба таври шоиста ба поён расонидани тамоми корҳои таҷҳизу ороишӣ то марти соли 2013 муҳлат дода шудааст. Баъди пурра ба фаъолият оғоз намудани он зиёда аз 50 ҷойи кори доимӣ муҳайё мегардад.Тавре ки иттилоъ дода шуд, бинои асосии чойхона аз 2 ошёна ва аз толори хурду бузург иборат буда, дар як вақт метавонад ба 300 нафар мизоҷон хизмат расонад.