Чорабинии идона дар ШВКД ноҳияи Хуросон

Душанбе, 9 ноябр. (АМИТ «Ховар» Ибодат Давлатова).- Бахшида ба Иди касбии кормандони милитсия дар тамоми ҷузъу томҳои мақомоти корҳои дохилӣ чорабиниҳои идона доир шуда, дар онҳо роҳбарият, ҳайати шахсӣ, собиқадорон, намояндагони ҳокимиятҳои маҳаллӣ ва оилаҳои кормандоне, ки ҳангоми иҷрои вазифа ба шаҳодат расидаанд, иштирок намуданд.Тавре ки ба мухбири АМИТ «Ховар» аз ВКД хабар доданд, аз ҷумла чунин як чорабинии идона дар шуъбаи ВКД дар ноҳияи Хуросони вилояти Хатлон доир гардид, ки дар он аз қаҳрамониву шуҷоат ва матонату далерии наслҳои гузашта ва имрӯзи ин мақомот ёдоварӣ карда, ба кормандони шоиста, собиқадорон ва оилаҳои кормандоне, ки ҳангоми иҷрои вазифаи хизматӣ ба шаҳодат расидаанд, мукофот ва туҳфаҳои хотиравӣ тақдим шуд.Дар чорабинӣ сардори ШВКД ноҳия подполковники милитсия Маҳмадназар Шарифов сухан гуфта, ҳайати шахсиро бо ин санаи фархунда самимона табрик намуда, барояшон барору комёбӣ ва дар иҷрои вазифаҳои хизматӣ садоқатмандиву бурдборӣ таманно намуд.