Гармхона ва пастравии нархи маҳсулот

Ҳамадонӣ, 8 ноябр. (АМИТ «Ховар», С. Холов).-Дилбастагӣ ба замин сокини ҷамоати деҳоти «Калинин»- и ноҳияи Мир Сайид Алии Ҳамадонӣ Файзимад Раҷабовро водор намуд, ки як гармхона бунёд намояд, то дар фасли зимистону баҳор ҳамдеҳагон ва бозори ноҳияро бо сабзавоти тару тоза таъмин созад. Гармхонаи Файзимад Раҷабов майдони шаш садяк заминро ташкил медиҳад ва ӯ дар он пайваста бо фарзандонаш заҳмат мекашад. Агарчи гармхона дар оғози соли ҷорӣ сохта шудааст, аз ҳисоби истифодаи самараноки он дар як мавсим ду маротиба ҳосил ҷамъоварӣ кардаанд. Шумораи чунин гармхонаҳо дар ҷамоатҳои деҳоти ноҳияи Ҳамадонӣ ва заминҳои наздиҳавлигии сокинон кам нест ва иловатан раёсати кишоварзии ноҳия бунёди боз чор гармхонаи дигарро ба нақша гирифтааст, ки бешак фаъолияти пурсамари онҳо ба пастравии нархи сабзавот дар фасли зимистон мусоидат хоҳад намуд.