Иҷлосияи 16-ум ва насли имрӯз

Душанбе, 13 ноябр. (АМИТ «Ховар», Афшини Муқим)- Имрӯз дар факултаи забонҳои Осиё ва Аврупои Донишгоҳи миллии Тоҷикистон бахшида ба 20-умин солгарди баргузории Иҷлосияи 16-уми Шӯрои Олии Ҷумҳурии Тоҷикистон бо иштироки устодон ва донишҷӯёни факулта конфронси илмиву оммавӣ баргузор гардид. Сайфиддин Назарзода, декани факултаи забонҳои Осиё ва Аврупо бо суханронии муқаддимавии худ дар мавриди Иҷлосияи 16-ум ва нақши он дар таҳкими амнияту суботи сартосарии кишвар конфронсро оғоз бахшид.  Ҳамчунин дар конфронс аз ҷониби устодони факултаи забонҳои Осиё ва Аврупо маърӯзаҳо дар мавзуоти «Иҷлосияи 16-ум – Иҷлосияи тақдирсоз», «Иҷлосияи 16-ум ва нақши он дар рушди ҷомеа», «Иҷлосияи 16-ум ва насли имрӯз», «Иҷлосияи 16-ум ва масоили сулҳу ваҳдат дар Тоҷикистон» пешниҳоди ҳозирин гардид. Дар конфронс маърӯзаҳое, ки аз ҷониби устодони факулта Зайдулло Мусайямов ва Зарина Раҳматуллоева пешниҳод гардиданд, беҳтарин маърӯзаҳо дониста шуданд.