Иҷрои барномаи иноватсионӣ

Душанбе, 23 ноябр.(АМИТ «Ховар», Лаззат Диловарзод).- Дар Маркази миллии ҷумҳуриявии захираҳои генетикӣ ба мухбири АМИТ «Ховар» иттилоъ доданд, ки соли ҷорӣ доир ба иҷрои Барномаи иноватсионӣ дар хоҷагии деҳқонии «Диловар»-и ноҳияи Файзобод 13 навъи тухмии зироати чойҷуворӣ ва 24 намунаи боқилои маҳаллӣ кишт гардид. Аз ҳар як гектар намунаи чойҷуворӣ аз ду дарав ба миқдори 850-900 сентнер ҳосили дон ва хӯроки сабз гирифта шуд.Соли ҷорӣ ҳамчунин дар 24 намунаи кишти боқилои маҳаллӣ бештар аз 15-20 дона ғилофакҳои ҳосилдеҳ ба мушоҳида расид, ки ин нишондиҳандаи хуби ҳосилнокӣ аз ин навъи зироат аст.Ба гуфти президенти Академияи илмҳои кишоварзии ҷумҳурӣ Ҳукматулло Аҳмадов, дар ду нуқтаи Маркази миллии ҷумҳуриявии захираҳои генетикӣ дар ноҳияҳои Файзобод ва Рӯдакӣ доир ба 44 намунаи ҷавҳои маҳаллӣ ва 77 намунаи ҷавҳои селексионие, ки аз Маркази байналмилалии ИКАРДА дастрас шудааст, таҳқиқоти экологӣ гузаронида шуд ва натиҷаҳои он ба мақсад мувофиқ аст.