Изҳороти Кэтрин Эштон

Душанбе, 30 ноябр. (АМИТ «Ховар»). – «Иттиҳоди Аврупо омодааст, ки ба Тоҷикистон дар масоили истифодаи энергия кӯмак намуда, усулҳои пайдо намудани роҳҳои таъминоти энергияро дастгирӣ кунад», — зикр дошт барои матбуот намояндаи доимии Иттиҳоди Аврупо Кэтрин Эштон баъди мулоқот бо Президенти Тоҷикистон Эмомалӣ Раҳмон, ки 29 ноябр дар шаҳри Душанбе баргузор гардид.«Мо дар ҷараёни мулоқот бо Президент Эмомалӣ Раҳмон ояндаи Афғонистон ва фаъолияти минбаъдаамонро дар ин кишвар баъди соли 2014, ҳамчунин аҳамияти дар оянда ҳам дастгирӣ намудани халқи Афғонистонро мавриди муҳокима қарор додем», — гуфт Кэтрин Эштон.«Тайи 20 соли охир барои дастгирии Тоҷикистон қариб 600 миллион евро ҷудо карда шуд. Ман басо хурсандам, ки навакак созишномаи молиявиро имзо намудам, ки он имкон медиҳад, рақобатпазирии бахши кишоварзию тиҷорати Тоҷикистон густариш дода шавад», — афзуд Кэтрин Эштон. Барномаи зикршуда иборат аз 16 миллион евро ба рушди бахши кишоварзии Тоҷикистон, ҳамчунин татбиқи дурнамои Ҳукумати кишвар барои ислоҳоти соҳаи кишоварзӣ мусоидат менамояд. Ин лоиҳа дар ҳамкорӣ бо Бонки аврупоии бозсозӣ ва тавсеъа амалӣ мешавад.