Кӯмаки навбатии Ҳукумати Амрико ба Тоҷикистон

Душанбе, 8 ноябр. (АМИТ «Ховар», Сарвинози Руҳуллоҳ)- Ҳукумати Иёлоти Муттаҳидаи Амрико ба бахши мухобиротии сохторҳои қудратии Тоҷикистон ба маблағи беш аз 2 миллион доллар кӯмак кард. Тавре ки ба АМИТ «Ховар» аз сафорати Амрико дар Душанбе хабар доданд, ин кӯмак, ки аз таҷҳизоти фаннӣ иборат аст, дар доираи «Лоиҳаи таҷҳизи бахши мухобиротии сохторҳои қудратии Тоҷикистон» ироа шудааст.  Имрӯз дар меҳмонхонаи «Ҳаят Реҷенсӣ»-и пойтахт маросими имзои санад аз ҷониби Сюзан Эллиот, сафири Амрико дар Тоҷикистон ва генерал Шералӣ Мирзо, фармондеҳи нерӯҳои марзбонии Тоҷикистон доир гардид. Ҳамчунин зикр гардид, ки дар марҳилаи аввали лоиҳа 37 таҷҳизот ба бахши мухобиротии кишвар вогузор гардид ва дар назар аст, ки дар чаҳорчӯби марҳилаи дуюми ин лоиҳа ба Тоҷикистон 58 адади дигар тақдим шавад.