Конфронс дар мавзӯи ташкили ҷойҳои корӣ

Душанбе, 2 ноябр. (АМИТ «Ховар», Ибодат Давлатова). – Имрӯз, 2 ноябр, дар шаҳри Душанбе конфронси дурӯзаи илмию амалии «Роҳҳои шуғли самарабахши захираҳои меҳнатии Тоҷикистон дар шароити иқтисоди бозаргонӣ» оғоз ёфт. Дар конфронс кормандони Вазорати меҳнат ва ҳифзи иҷтимоии аҳолии Ҷумҳурии Тоҷикистон, Муассисаи давлатии «Институти тадқиқоти илмии меҳнат ва ҳифзи иҷтимоии аҳолӣ» ҳамчунин иқтисоддонҳо, олимон ва аспирантҳои донишгоҳҳои олӣ ширкат доранд.Муовини аввали вазири меҳнат ва ҳифзи иҷтимоии аҳолӣ Эмин Сангинов зимни суханрониаш зикр намуд, ки имсол барои маблағғузории бахши иҷтимоӣ 5 миллиарду 100 миллион сомонӣ сарф карда мешавад, ки 50 фоизи ҳаҷми умумии буҷаи давлатиро ташкил дода, аз ҷумлаи он 3 миллиарду 400 миллион сомонӣ барои музди меҳнат, нафақа ва кӯмакҳои дигар пешбинӣ шудааст.Иштирокдорони конфронс ҳамчунин масоили шуғли захираҳои меҳнатӣ дар соҳаҳои индустриалии иқтисод, самарабахшии соҳаи кишоварзии Тоҷикистон ва шартҳои муҳимтарини истифодаи судманди қувваи корро мавриди муҳокима қарор доданд.