Кўчаву хиёбонҳои шаҳр номҳои тоҷикӣ мегиранд

Душанбе, 13 ноябр.(АМИТ «Ховар», Марзия Саидова).-Интизор меравад, ки то ҷашни 90-солагии шаҳри Душанбе, ки соли 2014 таҷлил хоҳад гашт, кўчаву хиёбонҳои пойтахт, ки бархеашон номҳои ғайритоҷикӣ доранд, ба номи шахсиятҳои барҷастаи миллат номгузорӣ мешаванд. Масъалаи мазкур дар ҷаласаи шаҳрдорӣ, ки бо иштироки роҳбарони комиссияҳои доимии Маҷлиси шаҳрӣ, сохторҳои марбутаи пойтахт, институтҳои шаҳрвандӣ баргузор шуд, матраҳ гардид. Вобаста ба масъалаи номгузории кўчаву хиёбонҳои шаҳр гузориши раиси Комиссияи доимии марбутаи Маҷлиси вакилони шаҳри Душанбе оид ба номгузории кўчаву хиёбонҳои шаҳр Абдулҳамид Самадов шунида шуд. Раиси шаҳри Душанбе Маҳмадсаид Убайдуллоев ба масъулин дастур дод, ки фаъолияти комиссия тақвият дода шуда, нисбат ба ин масъала фикру пешниҳодҳои сокинони пойтахт ба эътибор гирифта шавад.Раиси шаҳр ба манзури риояи Қонуни Ҷумҳурии Тоҷикистон «Дар бораи забони давлатии Ҷумҳурии Тоҷикистон» дар мавриди таҳияву насби шиору овезаҳои таблиғотӣ дар шаҳр аз сўи шахсони воқеиву ҳуқуқӣ муовинаш -Санавбар Раҳимоваро муваззаф намуд, ки дар ҳамкорӣ бо муовинони соҳавии раисони ноҳияҳо ва комиссияҳои марбутаи шаҳриву ноҳиявӣ то 1 январи соли 2013 нуқсонҳои мавҷударо бартараф карда, минбаъд барои роҳ надодан ба камбудиҳо тадбирҳои мушаххас андешанд.