Машқҳои зиддитеррористӣ

Душанбе, 8 ноябр. (АМИТ «Ховар», Лутфия Эшонқулова). – 7 ноябр дар дараи Ромит машқҳои муштараки зиддитеррористии Қувваҳои Мусаллаҳи Тоҷикистону Қазоқистон оғоз ёфтанд. Мувофиқи хабари сардори маркази матбуоти Вазорати мудофиаи ҶТ Фаридун Маҳмадалиев, дар машқҳо беш аз 100 нафар хизматчиёни ҳарбии ҷузъу томи тайиноти махсуси қувваҳои мусаллаҳи ҳар ду кишвар иштирок дошта, дар онҳо намудҳои мухталифи аслиҳаи сабук ва лавозимоти ҷангӣ истифода мешавад. Дар ҷараёни машқҳо беш аз даҳ унсури безараргардонӣ ва нест намудани террористони шартӣ такмил дода, усулҳои ягонаи ҳалли вазъияти бӯҳрономез ва таъмини амнияти минтақа муайян карда мешавад.Машқҳо таҳти роҳбарии муовини фармондеҳи қӯшунҳои зудамали Вазорати мудофиаи Тоҷикистон Тоҳир Хайруллоев сурат гирифта ва то 18 ноябр давом мекунанд.