Муҳокимаи масоили ҳамкорӣ

Душанбе, 9 ноябр. (АМИТ «Ховар»). – 8 ноябр дар шаҳри Истанбул мулоқоти вазири корҳои хориҷии Ҷумҳурии Тоҷикистон Ҳамрохон Зарифӣ бо президенти Конфедератсияи соҳибкорону саноатчиёни Туркия (TUSKON) Ризонур Мерал баргузор гардид. Ҷонибҳо дар ҷараёни мулоқот масоили ҳамкории тиҷоратию иқтисодӣ, вазъи сармоягузорӣ ва захираҳои обу энергетикаи Тоҷикистон ва ташкили ҳамоиши тоҷирони Тоҷикистону Туркияро, ки бояд моҳи декабри соли ҷорӣ дар Туркия баргузор гардад, мавриди муҳокима қарор доданд. Конфедератсияи мазкур созмони ҷамъиятию ғайритиҷоратӣ буда, соли 1990 таъсис ёфта буд. То имрӯз 7 федератсия, 173 ҷамъияту ассотсиатсия, 43 ҳазор соҳибкорони Туркия ва беш аз 120 ҳазор ширкат аъзои он мебошанд. Мақсади асосии конфедератсия мусоидат ба барқароршавии муносибатҳои байни соҳибкорони Туркия ва кишварҳои хориҷӣ мебошад. Конфедератсия дар шаҳрҳои Маскав, Брюссел, Пекин ва Вашингтон намояндагиҳои худро дорад. Дар ин бора аз Раёсати иттилоот, матбуот, таҳлил ва тарҳрезии сиёсати хориҷии ВКХ ҶТ ба АМИТ «Ховар» хабар доданд.