Муҳокимаи натиҷаи гуфтушунидҳои байниҳукуматӣ

Душанбе, 20 ноябр. (АМИТ «Ховар»). – Чанде пеш дар Вазорати ҳамкории иқтисодӣ ва рушди Олмон бо иштироки Сафири Ҷумҳурии Тоҷикистон дар Ҷумҳурии Федеративии Олмон ва намояндаи Вазорати рушди иқтисод ва савдои Ҷумҳурии Тоҷикистон мулоқоти пешакӣ барои муҳокимаи рӯзномаи гуфтушуниди пешорӯи байниҳукуматии Тоҷикистону Олмон баргузор гардид. 28 ва 29 ноябр дар шаҳри Душанбе гуфтушуниди байниҳукуматии ҳар ду кишвар баргузор шуда, дар ҷараёни он масоили ҳамкории минбаъдаи молиявию техникии бахши рушду татбиқи лоиҳаҳои нав бо иштироки Олмон барои таҳким бахшидани нерӯи молиявию иқтисодӣ, энергетикӣ ва илмию таҳсилотии Тоҷикистон мавриди муҳокима қарор мегиранд.Дар ин бора аз Раёсати иттилоот, матбуот, таҳлил ва тарҳрезии сиёсати хориҷии Вазорати корҳои хориҷии Ҷумҳурии Тоҷикистон ба АМИТ «Ховар» хабар доданд.