Мулоқот бо фаъолони ноҳияи Ҳисор

Душанбе, 29 ноябр. (АМИТ «Ховар», Лутфия Эшонқулова). – Чанде пеш роҳбарияти Хадамоти муҳоҷирати назди Ҳукумати Ҷумҳурии Тоҷикистон бо кормандони фаъоли ноҳияи Ҳисор мулоқот анҷом дод. Дар мулоқот роҳбари намояндагии Хадамоти федералии муҳоҷирати Русия дар Тоҷикистон Виктор Себелев, роҳбари Хадамоти муҳоҷирати Ҷумҳурии Тоҷикистон Сафиалло Девонаев ва раиси намояндагии Хадамоти муҳоҷирати ҶТ дар ФР Асрор Одинаев ширкат доштанд. Тавре ки аз шӯъбаи робита бо аҳли ҷамъияти Хадамоти муҳоҷирати ҶТ ба АМИТ «Ховар» хабар доданд, Сафиалло Девонаев зимни суханрониаш ба масоили касбомӯзии муҳоҷирони тоҷик, сатҳи дониши забони русӣ ва ҷилавгирии ба муҳоҷират рафтани ноболиғон таваҷҷӯҳи хоса зоҳир намуд. Сафиалло Девонаев зикр намуд, ки равандҳои муҳоҷират ба мубодилаи таҷриба, тарбияи кадрҳо ва ҷалби сармоя ба иқтисодиёти кишвар мусоидат мекунад.