Мулоқоти А.Миралиев бо П.Бартолотси

Душанбе, 15 ноябр. (АМИТ «Ховар»). – Чанде пеш дар шаҳри Брюссел мулоқоти муовини аввали раиси Маҷлиси намояндагони Маҷлиси Олии Ҷумҳурии Тоҷикистон Амиршо Миралиев бо сардори ҳайати Парлумони Аврупо оид ба Осиёи Марказӣ Паоло Бартолотси баргузор гардид. Дар сӯҳбат вакилони парлумони Тоҷикистон Галлия Рабиева, Рустам Латифов ва намояндаи доимии Ҷумҳурии Тоҷикистон дар Иттиҳоди Аврупо Рустамҷон Солиев низ ширкат доштанд.Дар ҷараёни мулоқот вазъу дурнамои рушди минбаъдаи равобити байнипарлумонии Ҷумҳурии Тоҷикистон ва Иттиҳоди Аврупо мавриди муҳокима қарор гирифт. Амиршо Миралиев аз ҷараёни таҳкими равобиту муколамаи байнипарлумонии Тоҷикистон ва Иттиҳоди Аврупо изҳори қаноатмандӣ карда, ба мусоҳиби худ барои мадади доимию амалии Иттиҳоди Аврупо ҷиҳати рушди иҷтимоию иқтисодии Тоҷикистон сипосгузорӣ кард.Дар ин бора аз Раёсати иттилоот, матбуот, таҳлил ва тарҳрезии сиёсати хориҷии ВКХ ҶТ ба АМИТ «Ховар» хабар доданд.