Мулоқоти С.Наҷмиддинов бо Э.Ауэр

Душанбе, 8 ноябр. (АМИТ «Ховар», Ибодат Давлатова). – 7 ноябр таҳти раёсати вазири молияи Ҷумҳурии Тоҷикистон Сафаралӣ Наҷмиддионов ва сафири Иттиҳоди Аврупо дар ҶТ Эдуард Ауэр ҷаласаи Кумитаи роҳбарикунанда оид ба арзёбии ҷараёни иҷрои шартҳои умумӣ ва махсуси созишномаи молиявии дастгирии буҷа бо Иттиҳоди Аврупо баргузор гардид. Тавре ки аз Вазорати молияи ҷумҳурӣ ба АМИТ «Ховар» хабар доданд, дар ҷаласа ҷараёни татбиқи ислоҳоти соҳавӣ мавриди муҳокима қарор гирифт. Ислоҳотро Иттиҳоди Аврупо дар чунин бахшҳо, аз қабили истифодаи маблағҳои давлатӣ, тандурустӣ ва ҳифзи иҷтимоии аҳолӣ, дастгирӣ менамояд.Сафаралӣ Наҷмиддинов натиҷаи ҷаласаро ҷамъбаст карда, зикр намуд, ки ҳамкорӣ бо Иттиҳоди Аврупо барои роҳандозии ислоҳот дар Тоҷикистон муфиду самарабахш аст.