Пешгирии интиқоли маводи мухаддир

Душанбе, 2 ноябр . (АМИТ «Ховар», Лутфия Эшонқулова).-Ҳангоми барасмиятдарорӣ ва назорати гумрукии мусофирони хатсайри №2954 самти Душанбе -Екатаринбург кормандони гумруки фурудгоҳи ш. Душанбе яке аз мусофиронро бо гумони интиқол додани маводи мухаддир гумонбар донистанд. Тавре ки Абдурахими Умариён Сардори Шуъбаи иттилоотии Хадамоти гумруки назди Ҳукумати ҶТ ба АМИТ «Ховар» хабар дод, мусофири гумроҳ як миқдор маводи шубҳаноки монанд ба навъи героинро дар дохили пойафзоли худ пинҳон карда, бар замми он миқдори зиёди капсулаҳоро бо роҳи фурў бурдан дар меъдааш низ ҷой мекунад. Ҳолати аз ҳама ташвишовар он буд, ки ҳаҷми ҳар як дона капсулаҳои истеъмолнамудаи ин мусофир ниҳоят калон ва вазни он то 7 грамм буд. Дар натиҷаи ташхиси махсус муайян гардид, ки маводи мухаддири боздоштшуда навъи героин буда, вазни умумии он 1кг 241,2 грам мебошад.Нисбат ба ин ҳодиса мутобиқи моддаҳои 32 кисми 3, 289 қисми 2 ва 200 қисми 4-и КҶҶТ парвандаи ҷиноӣ боз гардида, тафтишот идома дорад.