Раддияи Хадамоти муҳоҷират

Душанбе, 7 ноябр. (АМИТ «Ховар», Лутфия Эшонқулова). – Намояндагии Хадамоти муҳоҷирати назди Ҳукумати ҶТ дар ФР иштироки шаҳрвандони Тоҷикистон дар ихтилофоти сохтмончиёни иншоотҳои олимпии шаҳри Сочиро рад намуд. Хотирнишон месозем, ки, 6 ноябр дар як қатор васоити ахбори омма хабарҳо дар бораи моҷарои байни коргарони иншоотҳои олимпии шаҳри Сочии Федератсияи Русия пайдо гардиданд. Масалан, тибқи хабари «vesti.ru», коргарон дар пойтахти Бозиҳои олимпии соли 2014 задухӯрд ба миён оварданд, ки дар он гӯё қариб 240 нафар сокинони Тоҷикистон иштирок доштанд. Дар робита бо ин, Намояндагии Хадамоти муҳоҷирати назди Ҳукумати Ҷумҳурии Тоҷикистон дар Федератсияи Русия якҷоя бо раиси ҷамоаи тоҷикони шаҳри Сочи Фаррух Миров ин иттилоотро санҷида, баъди он муқаррар намуданд, ки дар ин хархашаи оммавӣ шаҳрвандони Тоҷикистон иштирок накардаанд.Дар ин бора аз дафтари матбуоти Намояндагии Хадамоти матбуоти Ҷумҳурии Тоҷикистон дар Федератсияи Русия ба АМИТ «Ховар» хабар доданд.