Шумораи қасрҳои варзишӣ меафзояд

Хоруғ, 12 ноябр. (АМИТ «Ховар», Л.Додо ). – Дар ВМКБ дар даврони истиқлолияти давлатӣ ба хотири рушди варзиш ба бунёди варзишгоҳҳо эътибори ҷиддӣ медиҳанд. Дар ин давра дар шаҳри Хоруғ, навоҳии Роштқалъа, Дарвоз ва марказҳои дигари навоҳии вилоят варзишгоҳҳои замонавӣ бунёд гардиданд. Имрӯзҳо бунёди чунин варзишгоҳҳо дар макотиби вилоят оғоз гардидааст. Ҳафтаи ҷорӣ дар мактаби миёнаи рақами 2 – и ҷамоати деҳоти Сағирдашти ноҳияи Дарвоз чунин як варзишгоҳи зимистона мавриди истифода қарор дода шуд. Дар он толори гӯштин, волейбол, баскетбол ҳавзҳои оббозӣ мавҷуданд. Тавре ки аз мақомоти маҳаллии ҳокимияти давлатии ноҳия хабар доданд, бунёди чунин варзишгоҳ дар мактаби маркази деҳаи Қалъаи Ҳусейн низ идома дорад.