Ёддоштҳо аз иҷлосия

Душанбе, 1 ноябр. (АМИТ «Ховар», Раъно Нусратуллоева).-Имрӯз дар маҷлисгоҳи Китобхонаи миллии Тоҷикистон дар доираи омодагӣ ва таҷлили 20-солагии Иҷлосияи 16-уми Шӯрои Олии Ҷумҳурии Тоҷикистон вохӯрии кормандони китобхона бо вакилони мардумӣ – иштирокчиёни Иҷлосияи таърихии 16-уми Шӯрои Олӣ Шодӣ Шабдолов ва Эшбӯрӣ Эсанқулов баргузор гардид.Тавре ки котиби матбуотии китобхона Фотима Яқубова ба хабарнигори АМИТ «Ховар» иттилоъ дод, дар чорабинӣ доир ба аҳамияти Иҷлосияи 16-ум дар таърихи давлатдории муосири тоҷикон ва нақши муҳими он сухан рафта, атрофи он баҳсу андешаҳо доир гардид.Ҳамоишро муовини аввали директори Китобхонаи миллии Тоҷикистон Саидҷаъфар Сафаров ифтитоҳ намуд. Сипас муовини директори китобхона Шариф Комилзода андешаҳои хешро доир ба тақдирсоз будани Иҷлосияи 16-ум барои миллати тоҷик баён дошт. Баъдан вакилони мардумӣ Шодӣ Шабдолов ва Эшбӯрӣ Эсанқулов оид ба ҷараёни Иҷлосияи 16-ум маълумоти муфассал дода, хотираҳои хешро аз ин иҷлосия ёдовар шуданд.