Зафари пахтакорони кишвар

Душанбе, 5 ноябр. (АМИТ «Ховар», Дилшодаи Хайруллоҳ) -Имсол кишоварзони ҷумҳурӣ баҳри ба даст овардани ҳосили фаровон ба номусоидиҳои ҳавои баҳори имсола нигоҳ накарда, дар майдони 199466 гектар кишти пахта гузарониданд, ки дар натиҷаи риояи дурусти қоидаҳои агротехникӣ тавонистанд иҷрои дурнамои пахтаро ба миқдори 401115 тонна таъмин намоянд. Дар натиҷаи меҳнати пурмаҳсул кишоварзони ҷумҳурӣ дар арафаи ҷашни 18-умин солгарди Конститутсия (Сарқонун)-и Ҷумҳурии Тоҷикистон дурнамои пахтаро пурраю барзиёд иҷро намуданд. Пахтакорони шуҳратманди вилояти Хатлон ба миқдори 268864 тонна (102 %) вилояти Суғд ба миқдори 112699 тонна пахта (100,2%) ҷамъ оварда, дар ҷумҳурӣ аввалин шуда, аз иҷрои дурнамои пахта баромаданд ва ҳамзамон уҳдадор шуданд, ки то пағаи охирин ҳосили пахтаро ҷамъоварӣ намоянд ва дар таъмини амнияти озуқавории кишвар ва ғанӣ гардонидани дастурхони мардум саҳми арзандаи худро гузоранд. Дар айни замон кишоварзони ҷумҳурӣ аз мусоид омадани ҳавои тирамоҳи имсола истифода намуда, барои ҷамъоварии ҳосили боқимонда муташаккилона меҳнат мекунанд.