Ғалабаи журналисти тоҷик

Душанбе, 4 декабр. (АМИТ «Ховар», Марҳабо Зунунова ). – Журналисти тоҷик Ирина Умарова ба қатори ғолибони Озмуни кушодаи умумирусиягии журналистон таҳти унвони «Русияи мухталиф» дохил гардид. Озмунро Агентии ҷумҳуриявии матбуот ва коммуникатсияҳои оммавӣ ва Иттифоқи журналистони Ҷумҳурии Тотористон доир намуданд. Тавре ки аз Кумитаи тадорукоти озмун хабар доданд, натиҷаи ин чорабинӣ дар шаҳри Қазон ҷамъбаст гардид.Дар озмун ба асарҳои эҷодӣ дар бораи таърих ва анъанаҳои миллию фарҳангии халқҳои сокини минтақаҳои Русия таваҷҷӯҳи хоса дода шуд.Дар маросими супурдани диплому мукофотҳо президенти Хазинаи «Академияи телевизиони Русия Михаил Швидкой, ҳамчунин журналистони маъруфи бахши телевизион Владимир Познер, Антон Хреков ва Арина Шарапова ширкат доштанд.