Қадрдонии барандагони стипендияи Президентӣ

Душанбе, 27 декабр. (АМИТ «Ховар», Ибодат Давлатова).- Ҷавонон нерўи созанда ва бунёдкори ҷомеа буда, барои ободу зебо намудани ин сарзамин нақши муассир доранд. Инро ба назар гирифта, борҳо Сарвари давлат Эмомалӣ Раҳмон ҷавононро «ояндасози миллат» номидааст. Тавре ки ба мухбири АМИТ «Ховар» мудири бахши таҳлилу иттилоот Ҷалолиддин Нуров хабар дод, 23 майи соли 2005 баъд аз мулоқоти Президенти ҷумҳурӣ бо ҷавонони кишвар теъдоди гирандагони стипендияи Президентӣ аз 100 ба 300 адад расид. Имрўз он хонандагоне, ки бо баҳои хубу аъло дар мактабҳои таҳсилоти умумӣ, литсейҳо, гимназияҳо, омўзишгоҳҳои касбию техникӣ, омўзишгоҳҳо, техникумҳо ва коллеҷҳо таҳсил менамоянд, сазовори ин стипендия мегарданд. Ба ин хотир 26 декабри соли ҷорӣ мутобиқи квотаи муайяншуда диплом ва маблағҳои 30 нафар барандагони стипендияи Президентии Ҷумҳурии Тоҷикистон барои мактабҳои шаҳри Душанбе дар толори мактаби таҳсилоти умумии №56- и ноҳияи Синои пойтахт аз ҷониби раиси Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон Маликшо Неъматов ботантана супорида шуд. Дар охири чорабинӣ гирандагони стипендияи Президентӣ барои ин ғамхорӣ ва дастгирӣ ба Прнзиденти ҷумҳурӣ ибрози миннатдорӣ намуда, ваъда доданд, ки бо баҳои хубу аъло хонда, дар ободу зебо гардонидани Тоҷикистон саҳми арзанда мегузоранд.