Ҷаласаи Шӯрои ҳамгироӣ

Душанбе, 25 декабр. (АМИТ «Ховар», Лутфия Эшонқулова). – 24 декабр дар шаҳри Душанбе ҷаласаи Шӯрои ҳамгироии ҷумҳуриявӣ оид ба ҷилавгирии сӯистеъмоли маводи нашъаовар бахшида ба ҷамъбасти натиҷаи татбиқи Барномаи ягонаи мақсадноки давлатӣ ҷиҳати пешгирии нашъамандӣ ва мубориза бо гардиши ғайриқонунии маводи нашъаовар дар Ҷумҳурии Тоҷикистон барои солҳои 2008 – 2012 баргузор гардид. Тавре ки аз маркази матбуоти Агентии назорати маводи нашъаовари кишвар ба АМИТ «Ховар» хабар доданд, муовини директори Агентӣ Бунафша Одинаева зимни суханрониаш зикр намуд, ки дар давраи татбиқи барнома дар ҷумҳурӣ тайи солҳои 2008 ва 2012 беш аз 24 тонна маводи нашъаовар аз гардиши ғайриқонунӣ бароварда шуд. Дар ҷараёни ҷаласа ҳамчунин ҳисоботи вазорату идораҳои салоҳиятдори ҷумҳурӣ дар бораи натиҷаи фаъолият ва татбиқи барнома шунида шуд. Ҳисоботи пурра дар бораи ҷамъбасти барнома моҳи январи соли 2013 ба Ҳукумати ҶТ пешниҳод мегардад. Аз рӯи натиҷаи ҷаласа қарорҳои дахлдор қабул шуданд.