Барномаи миллии рушди иҷтимоии ҷавонон дар ҶТ

Душанбе, 28 декабр. (АМИТ «Ховар», Ибодат Давлатова).-Ҷаласаи нахустини Комиссияи танзим ва ҳамоҳангсозии татбиқи «Барномаи миллии рушди иҷтимоии ҷавонон дар ҷумҳурии Тоҷикистон барои солҳои 2013-2015» дар шаҳри Душанбе баргузор гардид. Тавре ки ба мухбири АМИТ «Ховар» хабар доданд, дар маҷлис 7 масъалаи марбут ба ташаккули заминаҳои меъёрию ҳуқуқӣ ва методии барнома баррасӣ гардид. Дар ҷаласа шаклҳои дархостҳо, шартномаи ҳамкорӣ, фармоиш, арзёбӣ, баҳодиҳӣ ва ҳисоботӣ тасдиқ гардиданд, ки онҳо дар асоси таҷрибаи андӯхта ва меъёрҳои мавҷудаи байналмилалӣ бо мақсади таъмини шаффофият ва самаранокии барнома таҳия гардидаанд.