Бозиҳои интихобии мусобиқоти Осиё

Душанбе, 19 декабр. (АМИТ «Ховар»). – Конфедератсияи футболи Осиё ба Федератсияи футболи Тоҷикистон аз тақвими бозиҳо дар гурӯҳи «С» — и мусобиқоти Осиё байни ҷавонон, ки дар он дастаи мунтахаби футболбозони ҷавони кишвар иштирок менамояд, хабар дод. Дастаи мунтахаби ҷавонони Тоҷикистон оид ба футбол бо роҳбарии сармураббӣ Раҷаб Расулов дар бозиҳои интихобии мусобиқоти Осиё, ки аз 5 то 10 апрел дар пойтахти Непал шаҳри Катманду баргузор мегардад, иштирок мекунад. Футболбозони тоҷик мусобиқотро бо қувваозмоӣ бо дастаи Афғонистон оғоз намуда, сипас бо дастаҳои мунтахаби Бутон, Непал, Ҷазираҳои Малдив, ва Ӯзбекистон вомехӯранд.Хотирнишон месозем, ки ғолиби гурӯҳ ба қисми хотимавии мусобиқоти Осиё, ки соли 2014 баргузор мегардад, роҳхат пайдо мекунад.Дар ин бора аз Федератсияи футболи Тоҷикистон ба АМИТ «Ховар» хабар доданд.