Густариши ҳамкорӣ

Душанбе, 17 декабр. (АМИТ «Ховар», Покиза Маҳмадбекова). – Раиси Палатаи савдо ва саноати ҶТ Шариф Саид ва намояндаи тиҷоратии Сафорати Бангладеш Орифур Раҳмон Апу масоили ҳамкории дуҷонибаи тиҷоратию иқтисодии Тоҷикистон ва Ҷумҳурии Бангладешро мавриди муҳокима қарор доданд.Тавре ки аз Палатаи савдо ва саноати ҷумҳурӣ ба АМИТ «Ховар» хабар доданд, Орифур Раҳмон Апу зимни мулоқот зикр намуд, ки сафорат рушду густариш бахшидани ҳамкории тиҷоратию иқтисодии байни ҳар ду кишварро ҳадафи худ қарор додааст.Шариф Саид дар навбати худ ба мусоҳибаш аз хусуси пайвастани Тоҷикистон ба Созмони Умумиҷаҳонии Савдо хабар дода, диққати меҳмонро ба соҳаҳои афзалиятноки иқтисодиёти Тоҷикистон ва вазъи сармоягузорӣ ҷалб намуд. Зикр шуд, ки ҳамкории дуҷониба дар соҳаҳои гидроэнергетика, саноати маъдан, коркарди пашм, чарм, нахи пахта, саноати хӯрокворӣ, бахшҳои тандурустӣ, маориф ва сайёҳӣ самтҳои ояндадори ҳамкории дуҷониба маҳсуб меёбанд. Сипас мулоқот бо иштироки намояндагони ширкатҳои «Сафари коттон – Инвест», «Олим тексайл», «Экон», «Фаронак» дар мавриди судури нахи пахта ба Бангладеш давом дода шуд. Имрӯз содироти нахи пахта аз Тоҷикистон ба Бангладеш 35 миллион доллари ИМА – ро ташкил медиҳад. Ҷонибҳо аҳд намуданд, ки ҳамкорӣ дар ин самт вусъат дода шавад.