Консерти гуруҳи ҳунарии амрикоии «Делла Мэй» дар Душанбе

Душанбе, 10 декабр . (АМИТ «Ховар», Сарвинози Руҳуллоҳ) – Рӯзи 13-уми декабри соли равон дар толори консертии меҳмонхонаи «ВЕФА», консерти гурӯҳи ҳунарии “Делла Мэй” баргузор мешавад. Дар ин бора ба АМИТ «Ховар» аз бахши робита бо ҷомеаи Сафорати ИМА дар Душанбе хабар доданд. Тибқи хабари расида ин барнома дар доираи «Барномаи фарҳангии Сафорати Амрико дар Тоҷикистон» бо дастгирии Бахши маориф ва фарҳанги Департаменти давлатии ИМА ва дар якҷоягӣ бо бахшҳои радиои “Садои Амрико” дар кишварҳои Осиёи Марказӣ доир мегардад. Мавриди зикр аст, ки «Делла Мэй» — гурӯҳи муосири фолклорӣ аз шаҳри Бостони Иёлати Массачусетс буда, дар Тоҷикистон нахустин бор ҳунарнамоӣ мекунад. Гуруҳи «Делла Мэй» ба давлатҳои Осиёи Марказӣ — Покистон, Ӯзбекистон, Туркманистон, Қазоқистон, Қирғизистон низ сафар кардааст.