Маҳсулоти армуғони беҳтарини миллӣ дар соли 2012

Душанбе, 21 декабр. (АМИТ «Ховар», Ибодат Давлатова),-Имрӯз дар Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон маросими эълон намудани маҳсулоти армуғони беҳтарини миллӣ барои туристон дар соли 2012 баргузор гардид. Дар он раиси Кумитаи мазкур Маликшо Неъматов иштирок намуда, қайд кард, ки озмуни ҷумҳуриявӣ байни ҳунармандон ва косибони кишвар дар байни иштироккунандагони ярмаркаи зимистонаи ҳунарҳои мардумӣ, ки 8-9 декабри соли 2012 дар шаҳри Душанбе баргузор гардида буд, барпо гардид. Аз миёни зиёда аз 1000 маҳсулоте, ки 75 ширкаткунандаи ярмарка пешниҳод кардааст, аз ҷониби Комиссияи байнисоҳавӣ 9 маҳсулоти савғотии беҳтарини миллӣ барои туристон интихоб карда шуд. Бо қарори Комиссия бо назардошти сатҳу сифати маҳсулоти интихобшуда ҳар яки онҳо ба ҷойҳои муносиб дар озмун сазовор гардид. Яъне, се маҳсулот соҳиби ҷойи 1-ум, се маҳсулот сазовори ҷойи 2-юм шуда ва се маҳсулоти дигар ҷойи 3-юмро ишғол намуданд. Кумита ба ғолибони озмун мукофоти пулию дипломҳо тақдим намуд.