Муҳокимаи масъалаҳои озодии дин ва виҷдон

Душанбе, 12 декабр. (АМИТ «Ховар», Лутфия Эшонқулова).-11 декабр дар Душанбе вохӯрии ҳайати Комиссияи байналмилалии Иёлоти Муттаҳидаи Амрико оид ба озодии дин таҳти роҳбарии Сем Геҷденсон бо муовини аввали вазири корҳои дохилӣ Нурулло Орипов баргузор гардид. Зимни вохӯрӣ ҷонибҳо масъалаҳои мубрами рӯз, аз қабили озодии дин, виҷдон, эътиқод ва пешгирии ҳама гуна амалҳои дорои хусусияти террористӣ, экстремистӣ ва сепаратистиро баррасӣ карданд.Тавре ки сомонаи расмии ВКД хабар медиҳад, муовини вазири корҳои дохилӣ зимни мулоқот гуфт: «Тоҷикистон давлати дунявӣ буда, муколамаи давлат ва динро дуруст ба роҳ мондааст, ки ин барои пешрафти ҷомеа ва таҳкими симои байналмилалии ҷумҳурӣ мусоидат менамояд. Инчунин дар даҳсолаи охир масъалаҳои терроризм, экстремизм ва сепаратизм ба худ шаклҳои гуногуни фаъолиятро касб намудаанд, ки аз ҷониби кормандони ҳифзи ҳуқуқ ошкору пешгирӣ мешаванд».