Мубориза бо бемориҳои ғайрисироятӣ

Душанбе, 5 декабр. (АМИТ «Ховар», Кристина Эрлих). – Бо ибтикори намояндагии Созмони умумиҷаҳонии тандурустӣ дар Тоҷикистон ва Вазорати тандурустии ҶТ дар шаҳри Душанбе нишасти матбуотӣ дар мавзӯи «Идораи кӯмаки аввалияи тиббию санитарӣ ва бемориҳои ғайрисироятӣ» баргузор гардид. Дар ҷараёни нишасти матбуотӣ коршиноси қароргоҳи Созмони умумиҷаҳонии тандурустӣ Шанти Мендис Тоҷикистонро даъват намуд, ки барои ҷилавгирии бемориҳои ғайрисироятӣ ва коҳиш додани таъсири баъди онҳо чораҳои зарурӣ бинад. Шанти Мендис ҳамчунин ҷиҳатҳои мусбати низоми тандурустии Тоҷикистон, аз қабили татбиқи барномаҳои миллии оид ба ҳифзи тандурустии аҳолӣ, ҷилавгирӣ ва назорати бемориҳои ғайрисироятиро ба таври махсус қайд намуд. Муовини вазири тандурустии ҶТ Соҳибназар Раҳмонов зикр намуд, ки мутаассифона таъсири баъди бемориҳои ғайрисироятӣ, аз қабили бемориҳои қалб ва диабет сол аз сол афзуда, боиси корношоямии беморон мегардад.