Мусобиқаи мубоҳисавӣ дар Суғд

Душанбе, 7 декабр. (АМИТ «Ховар» Саидэҳсони Солеҳ),- 9 декабр Маркази бозори озоди Тоҷикистон бо дастгирии молиявии Институти «Ҷамъияти Кушода» — Бунёди Мадад дар Тоҷикистон, Фонди пажуҳишҳои иқтисодии «Атлас» ва Фонди Фридрих Науманн бори аввал сабқати мубоҳисавии иқтисодии минтақавии «Ҷоизаи бозори озод — Суғд 2012»-ро баргузор мекунад. Он ба мавзуъҳои иқтисодию масоили андозбандӣ, танзими давлатии иқтисодӣ, савдои байналмилалӣ бахшида шуда ва барои ҷавонони вилояти Суғд дар шаҳри Хуҷанд роҳандозӣ мешавад. Ҳадаф аз чорабинии мазкур афзун кардани донишҳои иқтисодии ҷавонон тавассути гузаронидани мубоҳисаҳо дар мавзуъҳои алоҳида мебошад. Сабқат аз рӯйи формати парламентии амрикоӣ сурат мегирад. Мубоҳисаҳои ҷавонон яке аз усулҳои самараноки омӯзиши ғайрирасмӣ буда, барои гирифтани донишу малакае, ки дар ҷомеаи демократӣ заруранд, равона шудаанд. Дар ин бора Ҷовид Муқим, корманди масъули Институти «Ҷамъияти Кушода» — Бунёди Мадад дар Тоҷикистон ба АМИТ «Ховар» иттилоъ дод.