Насби дастгоҳҳои муосир дар ҶСШК «Ресанда»

Душанбе, 25 декабр. (АМИТ «Ховар», Дилшодаи Хайруллоҳ).- Бо дастгирӣ ва мусоидати Вазорати энергетика ва саноати Ҷумҳурии Тоҷикистон бо мақсади баланд бардоштани сифати маҳсулоти истеҳсолшаванда (риштаи пахтагин ва матои бофандагӣ), паст намудани арзиши аслии маҳсулот ва рақобатпазирӣ дар бозори истеҳсолӣ дар ҶСШК «Ресанда» аз Ҷумҳурии Мардумии Чин ба миқдори зиёда аз 3 млн. долл. ИМА дастгоҳу таҷҳизоти замонавӣ, аз қабили дастгоҳҳои ресандагӣ ва бофандагӣ харид ва ворид гардида, дар айни ҳол дар ҳамкорӣ бо мутахассисони хитоӣ васлу насби онҳо оғоз гардидааст. Тибқи иттилои котиботи Вазорати энергетика ва саноати ҷумҳурӣ баъд аз истифодаи чунин дастгоҳҳо дар корхона ҷойҳои корӣ зиёд ва сифати маҳсулот беҳтар хоҳад шуд. Ин имконият медиҳад, то маҳсулоти корхона ба хориҷи кишвар, аз ҷумла давлатҳои Аврупо содир шавад.